समाचार

बिहिबारदेखि विराटनगरमा कडा लकडाउन हुन सक्ने

विराटनगर । विराटनगरमा बिहीबार (भोलि) देखि हिंडडुल र यातायातका साधन सञ्चालनमा कडाइ गरिने भएको छ । कोभिड १९ क्राइसिस म्यानेजमेन्ट समिति मोरङको बुधवार बसेको बैठकले सडकमा भिडभाड गर्न नदिइने निर्णय गरेको हो ।

नगरवासीलाई मास्कको प्रयोगलाई अनिवार्य गराउने र नगरेको खण्डमा जरिवाना तिराउनेसम्मको निर्णय बैठकले गरेको छ ।
अटो तथा सिटी रिक्सामा एकलाइनमा एकजनामात्रै यात्रु बोक्न पाउने, निजी प्लेटका सवारी साधनले सिटमा दुरी कायम गर्नुपर्ने, नगरे जरिवाना गर्ने निर्णय गरिएको छ ।

लकडाउनको पूर्वतयारीका लागि पहिलो चरणमा स्वास्थ्य, सुरक्षा र यातायात मापदण्ड कार्यन्वयन अनिवार्य गरिने भएको छ ।
जिल्ला प्रशासन कार्यालय मोरङको सभाहलमा आयोजित बैठकमा लकडाउन गर्ने कि नगर्ने भन्ने विषयमा छलफल भएपनि निर्णय गरिएको छैन । पहिलो चरणमा कडाई गर्ने र संक्रमितको संख्या थपिदैं गएको अवस्थामा मात्रै लकडाउनमा जाने छलफल भएको थियो ।

मोरङका सहायक प्रमुख जिल्ला अधिकारी धु्रवबहादुर खड्काले तुरुन्तै लकडाउन गर्नुपूर्व अन्य क्षेत्रमा कडाइ गर्ने निर्णय गरिएको बताउनुभयो । अवस्था हेरेर विस्तारै निर्णय लिइने उहाँको भनाई छ ।
विराटनगर महानगरपालिकाका मेयर भीम पराजुलीले नगरस्तरीय सीसीएमसीको बैठक राखेर निष्कर्ष निकालिने बताउनु भएको छ । संक्रमण समुदायस्तरमा विस्तार भएका कारण लकडाउन गर्नुपर्ने बाध्यात्मक स्थिति सिर्जना हुँदै गएको बताइएको छ ।

बैठकमा जिल्लाका सुरक्षा निकायका प्रमुखहरु, राजनीतिक दलका प्रमुखहरु, उद्योग वाणिज्य संघ, रेडक्रस, जनस्वास्थ्य, स्थानीय निकायका प्रमुखहरु पदाधिकारी र प्रतिनिधिहरु सहभागी थिए ।

यो समाचार साझा गर्नुहोस्

Leave a Reply

Your email address will not be published. Required fields are marked *